ភ្នំពេញ៖ អគ្គនគរបាលជាតិបានថ្កោលទោសចំពោះសេចក្ដីថ្លែងការរបស់ សម រង្ស៊ី និងប្រកាសថាបានត្រៀមខ្លួនរួចជាស្រេចដើម្បីចាប់ខ្លួន សម រង្ស៊ី ទៅតុលាការកាត់ទោសផងដែរ។
ក្នុងលិខិតថ្កោលទោសចុះថ្ងៃទី១៧ ខែតុលា អគ្គស្នងការនគរបាលជាតិលោក នេត សាវឿន បានចាត់ទុកចេតនារបស់ សម រង្ស៊ី ក្នុងការចង់ផ្ដួលរំលំរាជរដ្ឋាភិបាលនៅឆ្នាំ២០២៣ គឺជាចេតនាបដិវត្តន៍ពណ៌ បង្កចលាចលក្នុងសង្គម ដើម្បីបំពេញមហិច្ចតាបំផ្លាញសន្ដិភាពនៅកម្ពុជា។
ក្នុងលិខិតនោះក៏បានលើកឡើងផងដែរថា នគរបាលជាតិប្ដេជ្ញាការពារនូវរដ្ឋធម្មនុញ្ញ ការពាររាជរដ្ឋាភិបាលស្របច្បាប់ ការពារសម្ដេចតេជោ និងគ្រួសារ ពិសេសការពារឱ្យបានដាច់ខាតនូវសន្ដិភាពទោះក្នុងតម្លៃណាក៏ដោយ។ អគ្គស្នងការក៏បញ្ជាក់ជំហរគាំទ្រលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេនផងដែរ។
ការថ្លែងរបស់នគរបាលជាតិនៅពេលនេះគឺតែប៉ុន្មានម៉ោងប៉ុណ្ណោះបន្ទាប់ពីនាយករដ្ឋមន្ត្រី សម្ដេចតេជោ ហ៊ុន សែន ប្រកាសកំចាត់ចោលមនោគមវិជ្ជានយោបាយជ្រុលនិយមរបស់ សម រង្ស៊ី ដែលសម្ដេចថា ជានយោបាយរបស់ពូជក្បត់ជាតិ ៣ជំនាន់។
សម្ដេតេជោថា៖ «នឹងប្ដូរផ្ដាច់កំចាត់ចោលមនោគមន៍វិជ្ជានយោបាយជ្រុលនិយម នៃត្រកូលក្បត់ជាតិបីជំនាន់។ អ្នកឯងមកនិយាយអំពីត្រកូលហ៊ុនបាន ត្រកូលហ៊ុន និងត្រកូលសម អត់ដូចគ្នាទេ! ត្រកូលហ៊ុន មិនដែលចេះក្បត់ទេ! ត្រកូលហ៊ុនបានរួមចំណែកធ្វើឲ្យប្រទេសនេះរីកចម្រើន។ ត្រកូល សម ទេដែលក្បត់តាំងពីជីតា រហូតដល់ឪពុក រហូតដល់កូន»៕
